Ҫывӑх вӑхӑтра пире суйлав кӗтет. Халӑх хӑйӗн интересӗсене хӳтӗлеме пултаракан депутатсемпе партисене суйласа илмелле. Саккунпа килӗшӳллӗн кондидатсем хӑйсен рекламине хаҫат-журналсенче те вырнаҫтараҫҫӗ. Ҫав шутра — «Хыпар» хаҫатра та. Алла лекнӗ хаҫатсене пӑхнӑ май чӑвашлисенче хӑйсен рекламисене мӗнле чӗлхепе вырнаҫтарнине сӑнас терӗм.

Паллах, ытларах пайӗпе — вырӑсла. Кунта ӗнтӗ ытларах халӑха ярса илес, информацие нумайрах ҫын патне илсе ҫитерес тӗллев ларать пулас. «Пӗрлӗхлӗ Раҫҫей», «Тӳрӗ кӑмӑллӑ Раҫҫей», «ЛДПР», «Родина» — кусем вырӑсла кӑна вырнаҫтараҫҫӗ. Тата ытти вӗтӗр-шакӑррисем те пур — асӑнмастӑп вӗсене.

Чӑвашлисем те курӑнкаларӗҫ. Анчах сахал вӗсем. 10% пур-и? Ҫук та пуль. Шурчановпа Черкесов (уйрӑмах) хӑйсен баннерӗсене чӑвашла вырнаҫтарни чӑн та кӑмӑла кайрӗ. РФКП вара чӑн та чӑвашла реклама нумай вырнаҫтарать — хӑйсен программине те чӑвашлах пичетленӗ. Вӗсемсӗр пуҫне «Панулми» (Яблоко) кандидачӗсем чӑвашла реклама вырнаҫтарнӑ — Сапрыкин тата Яранский. Суйлава кайсан чӑн та, чӑваш чӗлхинчен вӑтанман «Панулми» кандидачӗсемшӗн сасӑламалла пуль?. «РФКП» шел те, ман кӑмӑла каймасть...

Хӑйсене «чӑвашлӑхшӑн ҫунакан» ҫынсем пек кӑтартакан баннерӗсене те пӑхрӑм. Андрей Суварин (чӑвашсен ҫут малашлӑхӗ су(ӑ)варсенче тени ҫапларах пуль ӗнтӗ...) вырӑсла ҫаптарнӑ, Олег Николаев та — вырӑсла.

Мӗнех, суйлавччен тата вӑхӑт пур-ха. Тен, чӑвашла вырнаҫтарас кӑмӑллисем тата та тупӑнӗҫ.