Юхма Мишши хатӗрленӗ «Ылтӑн ҫӳпҫе» кӗнекери статьясемпе малалла паллаштаратпӑр. Аса илтеретпӗр, кӗнекен иккӗмӗш ячӗ — «Чӑваш сӑмахӗсен вӑрттӑнлӑхӗ». Ӑна 1993 ҫулта кӑларнӑ («Вучах» библиотекинче).

Хӑшпӗр чухне пӗр-пӗр ӗҫе куракан, судра свидетель пулса пыракан ҫынна калас тесе ҫак сӑмахсене арпаштараҫҫӗ. Тӗрӗс ӗнтӗ, пӗр шутласан, иккӗшӗ те свидетель, ӗҫ епле пулнине куракана пӗлтерет, анчах кӳнтелепе тынӑ сӑмахсен уйрӑмлӑхӗ те пур. Кӳнтеле — хӗн курнӑ ҫын енчен, тынӑ — айӑпланакан енчен пынӑ этем. Айӑпласа калаҫаканни — талас. Судне тӑваканни — тинюк. Айӑпланаканнипе айӑплаканнине килӗштерес тесе ҫӳрекене амият, хута кӗрсе калаҫакана хунтӑ, теҫҫӗ. Килӗшӳ тума калаҫса татӑлни — мешӳрет. Пӗли-пӗлми элеклени — чухӑ, элеклекенни — чухӑҫ.