Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Атăл шывне ĕçрĕм

алтăрпа,

чунăм каннине

чухлаймарăм.

Савăнăçа çыртăм

сăвăлла,

кăмăл тулнине

туяймарăм.

1977, майăн 3-мĕшĕ, çывăрас умĕн, Шупашкар

Шăпам

чул хушшипе

кукăрăлса шурĕ.

Шăппăн,

çара уран ĕмĕтĕм енне

чул хушшипе авкаланса шурĕ.

Çĕкленсем, чĕрем,

ăмăрт кайăкăн.

1977, майăн 3-мĕшĕ, Шупашкар

Тухăçран шăппăн-шăппăн утса

Шурăмпуç тухрĕ пĕлĕт хĕрне.

Ĕшнере савнине чуптуса

Пач сисмерĕм эп çĕр иртнине.

Хам калас тенине савнине

Калаймарăм пĕр харăс йăлтах.

Шурăмпуç, килме пирĕн енне

Тăхтасам маншăнах эс пăртак.

– Эй, кам унта,

эй, кам унта кăшăртатать?

– Эпи-ха ку, эпи...

– Эй, мĕн унта,

эй, мĕн унта мăшăлтатать?

– Элчел-ха ку, элчел...

– Мĕн-ма эсир кунта

пĕрле,

хĕвел тухни пулманччĕ-çке

çĕрле?

– Анчах та çĕрсĕр

ир нихçан пулман,

хĕвелĕн хыçĕнчен

каç сĕмĕ нихăçан

юлман.

Ак мĕншĕн яланах эпир

пĕрле...

1977, майăн 3-мĕшĕ, Шупашкар

Тĕп асаннен,

тĕп асаннен тĕтĕрмелли

кăмпи,

юмланă ват юман

çăпанĕ;

тĕп асаттен,

тĕп асаттен мăн каткинче

паллашрăмăр,

эп тĕтĕмпе, эс куççульпе

туслашрăмăр.

Чĕрĕк ĕмĕртен,

чĕрĕк ĕмĕртен сана каллех

чĕртетĕп,

тĕп асаннен,

тĕп асаннен мехелĕпе

хама эп

тĕтĕретĕп.

Кун-çулăм çук,

Кун-çулăм ярăнса

юхмарĕ.

Тĕп асанне,

тĕп асанне кăмпиçĕм,

ăшри хаяр, тулти хаяр нимпе

тухмарĕ.

1977, майăн 3-мĕшĕ, Шупашкар

"Эх! — терĕм эп сана курсан, —

Мĕнле пулма пĕлнех".

Чи хитрине çак пунăçран

Эс илнĕ пуль вуçех.

Хитре виç виç кунлăх тенине

Мантартăн çийĕнчех.

Кĕрсе эс ман чĕре варне

Тетертĕн: "Эх!" Каллех.

Юрататăп-кĕвĕçетĕп, —

Йывăра ан ил вуçех.

Пурнăçра-и? Пĕлтеретĕп:

Эп — пыл хурчĕ. Эс — чечек.

Сарă-сарă

сар хĕвел,

сарă-сарă

сарă чечек.

Хура-хура

хура çĕр,

хура-хура

хура çĕлен.

Сарă сăн та

хура чун, -

хура сарă

çапла тĕс.

Сан тĕсӳ-ши,

манăн-ши?

Мар пулсассăн,

камăн-ши?

1977, апрелĕн 16-мĕшĕ

Поэт чĕри –

улма-йывăç хунавĕн пахчи.

Пĕринчен çынсем

хăйсен пахчисене

сыпнă улмуççи

куçараççĕ,

тепринчен çынсем

хăйсен чунĕсене

ырă шухăш хунавĕ

куçараççĕ.

Поэт чĕри –

улма-йывăç хунавĕн

пахчи.

Чĕре тапнине савни илтнĕ чух,

ăшра капланса тулса çитнĕ чух

«Саватăп сана»-теессĕм килет,

килет те сăмах – чĕлхеçĕм çĕтлет.

Аннемĕр алли çӳçе сĕртĕнсен,

тутри вĕçĕпе куçне типĕтсен

«Юратнă аннем» – теессĕм килет,

калас тенĕ чух сăмахăм çĕтет.

Савни туйăмне упрайрăм пулсан,

аннем ăшшине хăйне тавăрсан,

ун чух тин чĕнме хăю çитерем,

«Юратнă савни», «Юратнă аннем».

Уй-хирĕм – савни, çĕршывăм – анне,

эп парăмсене татман хамăнне.

Епле тивĕçес-ши çак пĕр ĕмĕрте

сире пĕлтермешкĕн хĕвел-ĕмĕте?