Reklamo

Аçтахар Плотников: Ярославль урамӗпе утса тухсан...

Аçтахар Плотников06.02.2009 20:595342 Пурĕ пăхнă

Ҫапла, пӗррехинче, ҫак урам тӑрӑх утса тухма тиврӗ. Ӗҫ вӗренӳ сессийӗ вӑхӑтӗнче пулса иртрӗ — заняти пуҫланиччен вӑхӑт нумайччӗ те сив ҫанталӑка пӑхмасӑр хула тӑрӑх уҫӑлса ҫӳрес терӗм.
Ярославль урамне утса ҫитрӗм ӗнтӗ... Утатӑп. Шупашкарти кашни ҫурт ҫине тенӗ пекех урам ятне тата ун номерне ҫырса хунӑ. Питӗ кирлӗ япала — васкавлӑ пулӑшу та кирлӗ чухне ҫурта хӑвӑрт тупма пултарать. Вӑт, утатӑп хайхи... Утнӑ май пӗр ҫурт ҫине «Ярославский урамӗ» тесе ҫырнине асӑрхарӑм. «Эх», — тетӗп хам ӑшра, — «чӑвашла тӗрӗс куҫарма пӗлеймен иккен...» Тепри патне ҫывхарнӑ май ун ҫинче те пулин тӗрӗс ҫырнӑ-ши тесе шухӑшлатӑп. Ҫук, иккен! Кунта Ярославль те, Ярославский те мар иккен — ЯрославЕль урамӗ! Чӑн та, суймастӑп — ЯрославЕль! Ӗненместӗр пулсан урам тӑрӑх утса тухӑр — Ярославель урамне куратӑрах!
Ман вӑхӑт нумай-ҫке... тата икӗ тӗрлӗ ҫырнине курнӑ май ку мана кӑсӑклантарса ячӗ — тӗрӗс ҫырни пур-ши тесе урам тӑрӑх малалла таплаттартӑм. Тепӗр ҫурт ҫинче виҫҫӗмӗш тӗс тупӑнчӗ — Ярослав урамӗ. Вырӑсла "ул. Ярославская", чӑвашла вара "Ярослав урамӗ" кунта пулса тӑнӑ. Тӗрӗсси вара хальлӗхе (пӗрремӗшне курнӑ хыҫҫӑн) курӑнмарӗ-ха... - малалла утатӑп. Воробьев композиторсен урамӗ патне ҫитнӗ тӗле ҫеҫ тӗрӗс ҫырни тӗл пулчӗ — Ярославль урамӗ. Пӗрре тӗл пулнӑ хыҫҫӑн вара мӗн Хӗрлӗ лапамчченех тӗрӗс ҫырнӑ.
Сӑмах май Хӗрлӗ лапама ҫитнӗ май «Мода ҫурчӗ» еннеле утас терӗм. Паллах, урам ячӗсене епле ҫырнине сӑнаса пытӑм. Чи пӗрремӗш ҫурчӗ «Хӗрлӗ площадь», тепри вара — «Хӗрлӗ тӳрем» (кӑна пӑтраштарма та пултаратӑп — ун хыҫҫӑн вӑхӑт самай иртрӗ те... Анчах юнашар ҫурсенче урам ятне пӗрешкел ҫырман — кӑна ҫирӗплетсе калама пултаратӑп).
Вӑт ҫапла вырӑссем Ярославль урамӗнче пурӑнаҫҫӗ пулсан, чӑвашӗсем вара расна урамсенче пулӗ. Пӗри Ярослав урамӗнче, тепри — Ярославль урамӗнче. Виҫҫӗмӗшӗ — Ярославский урмӗнче, тӑваттӑмӑшӗ вара пушшех те ЯрославЕль урамӗнче. :)
Шупашкарта кун пек урамсем чылай теҫҫӗ — вӗсем тӑрӑх тепринче утса тухӑп :)

Redakcia noto: La publikigo de artikoloj ne signifas, ke la redakcia estraro dividas la opinion de ĝiaj aŭtoroj.

[Aldoni novan komenton (2)]

Komentoj:

Анонимла // 1321.95.8132 2009.02.06 22:19
	фотоаппаратпа ÿкерсе илмеллеччĕ.
Аçтахар Плотников // 3827.36.9202 2009.02.06 23:10
	Фотоаппарачĕ çумрахчĕ-ха. Анчах та эп ятарласа урам ячĕсене ӳкерме тухманччĕ те... ӳкермерĕм. Эп уçăлса çӳремелле утрăм та-ха... Çуллаччен ячĕсене тӳрлетмесен — ӳкерсех кăтартăп.