Африкăн хĕвелтухăçĕнче çур ĕмĕр ытла типĕ çанталăк тăни унти 10 миллион ытла çынна пырса тивнĕ. Пин-пин çемье, çав шутра çара уран чупакан ачасем те, Сомалирен Кение кайнă. Унта çитиччен вĕсем хĕвел хĕртекен çĕр тăрăх шывсăр-апатсăр утнă. Сомалире пурăнма май пулман: тыр-пул пĕтнĕ, выльăх-чĕрлĕх вилнĕ… Кенири çурçĕр-хĕвеланăç районĕнчи халăхăн 37 процентне яхăн выçăпа аптăрать. Сомалири нумай ача çакна пула çул çинче вилнĕ.

Сăнÿкерчĕкре – 2-ри Аден Салаад. Амăшĕ çине пăхать. Лешĕ ăна «Врачи без границ» пульницăра шыва кĕртет. Унта Аден выçăпа аптăраса ÿкнĕрен сипленет.

Сомали çыннисем выçлăхран Дадааб лагерьте çăлăнаççĕ. Вăл – Кенире. Кунта кашни çул 10 пин ытла çын килет. Начарланса кайнă 1-ри Хабибо Машир та унта сипленет.

Типшар виçĕ çĕршыв чиккинче – Кени, Эфиопи тата Сомали. Кунта пурăнакансем хăйсем ÿстернĕ çимĕçсемпе тăранса пурăнаççĕ, çавăнпа вĕсен пурнăçĕ тухăçлăхран, выльăх-чĕрлĕхрен килет. 1 çулти Салдано Осман та сипленет. Ăна ятарлă аппаратпа çитереççĕ.

www.dec.org.uk сайтра шар курнисем валли укçа пухаççĕ. Сăнÿкерчĕкре – Сомалири пĕчĕк ача, пульницăра сĕт ĕçет.

Сомалирен тарса килнисем – лагерьте. Карта йĕплĕ пралукран. Малта – гуманитари пулăшăвĕпе килнĕ тип çу савăчĕсем.

Çемьесем палаткăра пурăнаççĕ.

Хăйăр тăвăлĕ пуçлансан çынсем акаци çывăхĕнче алă айĕнчи япаласемпе хÿтĕленеççĕ.