Улăхра

Сарăлать ем-ешĕл улăх

Энĕш шывĕ хĕррипе.

Ун çаранĕ шыв пек тулăх,

Хумханать çил вĕрнипе.

Катаран куçа çиеççĕ

Ытарма çук чечексем.

Вĕсене татса килеççĕ

Пуç кăшăль тума хĕрсем.

Кăшшин-кашшин, янкăс саслăн,

Илтĕнет çава сасси.

Каччăпа хĕр ăмăртаççĕ, —

Хыçалта ĕнтĕ каччи!

Çивĕтне вĕлт ывăтать хĕр,

Ах чипер-çке куçĕсем!

Юратмасăр мĕнле тӳсчĕр

Çулăм чунлă каччăсем!..

Васкатать хĕрсех пĕр йĕкĕт

Çулакан машинăна.

Юрату та çĕнĕ ĕмĕт

Тыткăнланă каччăна.

Ав, лере сип-симĕс утă

Тавăрать пĕр ушкăн хĕр.

Чунĕсем хаваслă, çутă.

Ма тесен — пуян-çке çĕр!

Çĕнĕ комментари хуш