«Чӑваш халӑх сайчӗн» яланхи хыпарҫи Виталий Станьял юлашки вӑхӑтра сыватӑшра выртрӗ. Кунта хавасли акӑ мӗн: ун патне юлташӗсем Раҫҫейӗн тӗрлӗ кӗтесӗсенчен шӑнкӑравласах тӑнӑ иккен. Аякран килнӗ саламсене (Михаил Саватнеев музыкант, Камчатка* Федор Мадуров учитель, Аксу* Валерий Ильдуганов культуролог, Тюмень* Николай Кондрашкин скульптор тата ытти нумай ҫыннисене) аксакал кӗске йӗркесемпе тав тунӑ.

Сире сыватӑшри хӑшпӗр саламсемпе паллашма сӗнетпӗр.

* * *

Кам пӗлет мӗскер пулассине?

Шанчӑкпа упратӑп вӑй-хала.

Хӳтлӗх кирлӗ пӗчӗк ҫынсене,

Танлӑх кирлӗ пурнӑҫ майлама.

* * *

Калатӑн эс — ҫын пурӑнни телей.

Этем патне пыратӑн пӗр хаваслӑ.

Чӑваш турри! Парсамччӗ сан тӗле

Пехет те пурлӑх, сӑвапсем курмалӑх.

* * *

Пурнатпӑр. Курнатпӑр. Каятпӑр.

Ӗҫ ӗҫлетпӗр-ха, унсӑр мӗнле?

Кунҫула ҫакӑ пурнӑҫ таять-тӑр,

А ӑна эпир пӗртте пӗлмен!

* * *

Эпир санпа иртен-ҫӳрен кӑна.

Каятпӑрах тухса ыран-паян.

Те чухлаятпӑр-ха ӑна-кӑна,

Те ним пӗлмесӗрех иртсе каян...

* * *

Усал алхаснӑ вӑхӑтра

Ман ӗмӗр иртрӗ.

Салтак пекех, хаяр вутра,

Пире вӑл хӗртрӗ.

Тӗрӗс тесе тавлашӑнма

Тек кирлӗ пулмӗ.

Ӳпкелешме те ютшӑнма

Чӑвашлӑх хушмӗ.

* * *

Пиелесе ӳҫтерчӗ кил хуҫи.

Ачашласа этем картне кӑларчӗ.

Халь хамӑр та вӗт пултӑмӑр мучи.

Пире те, тен, несӗл тӗпне хӑварчӗҫ?

Тата кама йӑхсен тав тумалла?

Тата мӗскер вӑл мухтанмалӑх тӗп ӗҫ?

Калатӑп хытарсах: яшсем — мала,

Кил вучахне упрамалла — сан тивӗҫ!