«Лăсканса çурхахланнă кун-çулăм…»

Мальвина Петрова | Сăвă | 786


Лăсканса çурхахланнă1 кун-çулăм,

Сапламашкăн сана çĕнĕ пулăм

Хальлĕхе хĕрхенсе парнелет

Пурăнма хистекен çут тивлет2.

 

Ситрелсе3 сапаланнă сĕвемĕн

Асăмри самантсем тĕллĕн-тĕллĕн —

Хăртласа4 ĕлкерес йӳтĕмпе5

Пĕтĕре(тĕ)п сăвăлла шерепе;

 

Сӳтĕлсе каясран тĕвĕлетĕп —

Вĕçĕнче вырнаçтарăп çут ĕмĕт;

Шăрçаланнă куççуль тирĕмне6

Сыпăнтарăп ĕлккенлĕх7 кӳме.

 

Ăнăçу сикчевне8 пытармалăх

Ĕненӳ, теветкеллĕх, ăсталăх —

Алылмаш — эреветлĕ тĕрре

Куçараççĕ утас çул-йĕре.

 

Куллăмпа укаланнă çĕн кунăм!

Сыпăнтарĕ сана ырă сунăм —

Иртнипе — ӳркенми кашнинчех

Шăпана çут элчел9 пӳкличчен.

 
1 çурхах – çĕтĕк-çурăк
2 тивлет — телей
3 ситрел – саланса кай
4 хăртла – юса, сапла
5 йӳтĕм — сăлтав
6 тирĕм — çыхă
7 ĕлккенлĕх — илемлĕх
8 сикчев – сиктерсе хăварни
9 элчел – вилĕм

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: