Электронлă вулавăш

Çил-тăман алхасать çĕрĕпех урамра.

Мăрьере çил ачийĕ улать.

Ăнланман тунсăх çеç ман паян чунăмра...

— Мĕн пирки чĕрене вăл тулать?

Вучахра вут çунни ӳт-пĕве ăшăтмасть,

Çут эрех пуçăма каяймасть.

Çил-тăман урамра нипле лăпланмасть,

Ман чĕрем канăçне тупаймасть.

Хĕллехи вăрăм каç ниепле те иртмест...

Вучахри шĕл-кăвар та сӳнет.

Çакă тунсăх мана мĕн пирки шеллемест?

Çут эрех те ăна çĕнеймест!

Вучаха вуттине тепĕр хут пăрахса

Тивертес çĕнĕрен çулăма.

Чун-чĕре алăкне питĕ тачă хупса

Май тупас лăплатма чунăма.

Çил-тăман пурпĕрех ир енне чарăнать,

Мăрьери çил ачи лăпланать.

Вучахра вут çунни ут-пĕве ăшăтать!

Тунсăх иртĕ-ха, ыйăх пусать....