Электронлă вулавăш

(философиллĕ-юптаруллă ирĕклĕ сăвă)

Кам вăл – арçын? Кам эсĕ – чăваш арĕ?

Пĕлсех Чăваш Юманĕпе танлаштараççĕ-ши сана?

Çулсем вĕçсе пыруçăн ĕмĕрлĕх кĕрлевĕ,

Иртни тата пуласлăх пăлхантараççĕ-ши чунна?

Туссем, пуçа ватар пĕрле: арçын телейĕ…

Мĕнре вăл? Мĕнех телей кӳме пултарĕ арçынна?

Хăçан телейпеле çиçет ун пичĕ-куçĕ?

Хăçан вăл хатĕр çавăрмашкăн тепĕр май Çĕр чăмăрне?

Пĕлеп, аслăраххи-ăслăраххи, ак, калĕ:

-Арçын телейĕ – вăрçă çуккинче. Çак тăнăç пурнăçра

Вăрçă кĕрлевĕ мар, ача-пăча шăв-шавĕ

Тата юратнă мăшăр хуçаланччăр сирĕн çуртăрта...

Мĕнре е, тен, камра чăн-чăн арçын телейĕ?

Хăçан халь-халь сиксе тухассăн тапать унăн чĕри?

Укçа? Футбол? Сăра? Карьера? Тутлă шашлăк?..

Тен, çĕн машина туянсан? Тĕслĕрен, «Феррари Энцо»?..

Теле-е-ей… Куç умĕнче вара — Чăваш Юманĕ…

Чунра – аваллăхран, йăх-тымартан тапса тăран хăват.

Арçын, тен, ывăнмасăр тырă актăр, утă

çултăр, вутă çуртăр? Килес ăру валли çул хывтăр?..

Арçынсенче, паллах, курас килет хăюлăх. —

Инкек-синкек килсе тухсан е, тен, усал-тĕсел ерсен

(Паллах, ан пултăр ун пекки) кам лăплантарĕ?

Камăн тĕреклĕ çурăмĕ хыçне пытанăпăр, хĕрсем?

Арçын тенин телейĕ — унăн вăйĕнче тен?

Тавлашăва чарма, кирлех тăк — «çук» теме пултарнинче?

Е, тен, килсе тухсассăн пурнăç пăтăрмахĕ

Пулас çĕнĕ ăрушăн пурăнма вăй-хал çитернинче?..

* * *

…Пĕтĕмлетсе вара, ентешĕмсем, çапла калам:

Арçын телейлĕ хăй кирлине туйсан, алли-ури ĕç

Таврашне пырсан. Çурта çути ытамĕнче

Куçран-куçа пăхса унта йăхсен малашлăхне курсан.

Эппин, пĕрлех пурнар, упрар тус-тăвана,

Темле пулсан та… — арçынсăр йывăр, тупата.

Улăпсене вара, кĕрнек Юмансене —

Чăваш тĕнчин пуласлăхне — çитĕнтерер пĕрле.