Асăмран тухмасть-çке тăван кил

Каç пулать. Улшăнать пек çанталăк,

Çурçĕртен чĕпĕтет сивĕ çил.

Чун чĕтрет. Хупăнать ĕнтĕ алăк,

Асăмра — ман çаплах тăван кил.

Хĕвеланăç хĕрелнĕ вăтаннăн —

Пăсăлать пулас кун ыранран.

Пăсăлать-и е çук-и — халь манăн

Тăван килĕм тухмасть асăмран.

Аякран — хулара илĕртӳллĕ,

Çывăхран — пурнăç мар, çавра çил.

… Каç пулать. Тӳпере — тăрна çулĕ,

Асăмран ман тухмасть тăван кил.

Çĕнĕ комментари хуш