Хусанкай лампи

Геннадий Айхи | Сăвă | Петĕр Хусанкай | 2 550


1

Чунрине май пур таран

кăшт калайăп-и?

...Ман сĕтел çинче ялан —

Хусанкай лампи.

 

Парнеленĕччĕ ăна

ывăлĕ тахçан.

Çутă ункă... Мĕн кăна

эп унра курман?

 

Пушкин сăнлĕ кабинет

çавă çутăра.

Акă амăшпе пуплет

пĕчĕк кухньăра.

 

Акă Йăлăм, пыл шăрши...

Пĕр кĕввех поэт:

«Пырăр-ши» те «пымăр-ши», —

интонацилет.

 

2

Антрацит хĕмленнĕнĕх

йăлт çиçет кулли.

Унсăр халь, тен, тĕксĕмрех

ун тăван хули?

 

Шутламастăп-ха апла!

Упрĕ ĕмĕрнĕ

çĕр-çĕр ял, вуншар хула

унăн сăнарне.

 

Хурарахчĕ куç хури,

хурланма тивсен:

«Вĕтĕ те,— вĕçĕ-хĕрри

çук-мĕн вĕт чунсен».

 

Халăх палăртнă этем

пулнине пĕрех

пил пек туйнă вăл теем

хăй Сиктĕрминчех.

 

Ылтăнлатрĕ пиллĕ ĕç

пиллĕ сăнара;

пурнăçа шанманни çеç

çукчĕ çав сăнра.

 

3

Ăс парса каланисем!

Халь те çак каçра

çаврăнаççĕ пек вĕсем

шухăшăм тавра.

 

Нумай енлĕхĕ асрах

пулнăран-и, тен,

савнă çĕр те çывăхрах

ун ячĕпелен.

 

Кĕмен мар сăнлăхĕсем

ман йĕркесене, —

ун «тики-тикийĕсем»

тетĕп вĕсене!

 

Ĕмĕт те, асран кайми, —

унпалан — чĕрех.

ур тĕк те, алран кайми, —

ун аллинченех!..

 

4

Пулчĕ —тĕрлĕ лирăна

пĕрлештерекен.

Кĕнĕ манăн шăпана

унпалах — Верлен.

 

Хăй вара çав Мастера

савнă уйрăмах:

музыкаллĕх, сăвăра, —

ун та — верленлах!

 

Ача чух ун патĕнче

пурăнма пӳрсен

сăвăсăр мана пичче

ырă каç темен:

 

«Эй, плацкарт вакун! Пăртак

çыврасах пуль сан».

— Кам сăвви ку?— Пастернак.

Пĕлĕн-ха кайран.

 

Виççĕн Миттапа утни

çав çуттах кĕрет.

Иккĕш шăппăн юрлани

халь те илтĕнет.

 

5

Туррăм-музăкăм! — Вăя

вăл кисретнĕ май

Моцартла Хусанкая

асăнни — нумай:

 

шурăмпуç кӳлепи пек

ялтракан орган

унăн «Аптраманĕпе»

туйăнать пек тан,

 

е ун Танийĕ утать

Клерхен юррипе,

сĕлĕ шерепи янрать

çил тӳттĕлĕпе...

 

6

«Эп вилсен пĕр эрнене

ĕç юлать», — тесе

калаçатчĕ ман анне

шăппăн эрленсе.

 

Хусанкай кайсан часах

сисреç ентешсем:

юлчĕç пуль — вун çуллăхах

вăл тăвас ĕçсем!

 

Тен, Никольский сăмахне

вăл асран яман:

«Пĕлтĕм эп халь чыс мĕнне:

эп — кахал пулман».

 

Эсĕр — курăр ун тертне

вăтăр томĕнче.

Курнă эп — аллисене!

Ак куç умĕнче:

 

Шав машинкăпа «çапса»

(утмăлмĕш çулта)

пӳрнисем хăпаланса

шăтнăччĕ йăлтах…

 

7

Хăй лампийĕн çутинче

çутă та вĕри

тинкерет вăл, ман пичче,

ĕçĕмĕн тӳри.

 

Хăй шӳтлетчĕ: «Свет çути»...

Халь çав çутăра

сас парать Сăмах Ăсти:

Тăрăш... Ан аптра...»

 

«Ан хăвар ӳкĕнĕçе», —

терĕ — кайиччен.

Кам вĕрентеет Ĕçе,

çав — Вĕрентекен.

 

Уншăн та ӳссех пырать

ĕçĕм тейĕй-и?

...Ман сĕтел çинче çунать

Хусанкай лампи.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: