Электронлă вулавăш

Вĕри те çутă кăмăл хумĕ

Хаваслăн чĕрене тулать.

Паян эп, çĕнĕ суйлав умĕн,

Пăхса тухасшăн хам çула.

 

Ĕмĕтĕмпе малашлăха та

Пăхатăп тинкерсе паян.

Çĕршывăмпа эп мухтанатăп,

Унпа эп — чаплă та пуян.

 

Мана суйланă чух каларĕç, —

Çав пил вăл чĕререх тăрать:

Хăвна ӳстернĕ халăха эс

Ялан та Ленин пек юрат!

 

Хĕвел çуртне эпир тусаччĕ,

Тусаччĕ капăр керменсем.

Çавал çинче те гидростанци

Çутсаччĕ çутă çăлтăрсем.

 

Пĕр-пĕр тӳрккес те сивĕ куçлă

Этем тăрсассăн çул çине,

Ăна сирсе, эпир çул уçнă,

Васкатнă хамăр ĕçсене.

 

Çанталăк тепĕр чух тĕтреллĕ

Пулсан та, уçă пултăр çул.

Ленин пекех таса чĕреллĕ,

Тӳр шухăш-кăмăллă эс пул!

 

Тăшман сиксе ӳксен ултавлăн

Пирĕн Тăван çĕршыв çине,

Мĕнпур тăвансемпе пĕр танăн

Эп тухрăм халăх вăрçине.

 

Хыçра выртать нумай пин çухрăм,

Писмерĕм эп вут-çулăмран,

Çарпа пĕрле эп утса тухрăм

Мăн Атăлтан Берлин таран.

 

Ман пуçăмра пĕр шухăш пулнă,

Çав шухăш нихăçан сӳнмен:

Ленин пекех эс пул хăюллă,

Пĕр тăшмана та ан хĕрхен!

 

Юнпа хаяр вут-çулăм урлă

Утса каçсассăн, ак татах

Пуçланчĕ лăпкă, çутă пурнăç, —

Ĕçе чĕнет вăл, васкатать.

 

Çĕнĕ çынсем эпир суйлатпăр

Çĕршыв ĕçне туса пыма.

Татах пехиллесе калатпăр

Халь вĕсене те пĕр сăмах.

 

Вăл аслă халăхăн сăмахĕ,

Вăл чĕререх çунса тăрать:

Хăвна ӳстернĕ халăха эс

Ялан та Ленин пек юрат.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн