Электронлă вулавăш

Паттăрсем савăнмалăх

Хумханать тулăх хир.

Талккишпех çутçанталăк

Сарнă ешĕл кавир.

Çав паха кавир тăрăх

Эшелон ăмăртать.

Епле ăшă та ырă

Паян кун кăкăрта!

Йывăçсем пуç таяççĕ

Чаплă эшелона.

Кайăксем мухтавлаççĕ

Çакă ырă куна.

Эшелон, ăмăрт, ăмăрт,

Малаллах вĕçтерсем!

Çитчĕр кăмăллăн, хăвăрт

Килсене паттăрсем.

Кĕтет амăшĕ чун пек

Пĕртен-пĕр ывăлне.

Тватă çул вутсăр çуннă —

Кĕтнĕ хĕр савнине.

Паттăрсем, килĕрсем тет,

Йыхăрать пурсăра

Саркавай пичкере те

Пыл пек тутлă сăра.

Такасем эпир пуснă,

Эпир тунă шăрттан.

Хапхасем эпир уçнă —

Хапăл пĕтĕм чунтан.

Сирĕн пек паттăрсемшĕн —

Тулăх çăкăр-тăвар.

Хамăр аслă çĕрсемшĕн

Эсир тăтăр хастар.

Йышлăлантăр, кĕрлетĕр

Паттăрсен кĕреки.

Çĕнтерӳшĕн çĕклентĕр

Пирĕн савăш курки!