«Троллейбусра ларса пыратăп...»

Троллейбусра ларса пыратăп.

Чунра ман пушă та кичем.

Шухăшсемпе асапланатăп,

Илĕртеймест çурхи илем.

Ак майĕпен пуçа çĕклерĕм:

Ман çинелле шăтарасла,

Пĕр тĕлĕнсе, тепре ӳпкевлĕн

Пăхать ик-виç çулхи ача.

Вăл пăхрĕ-пăхрĕ те йăл! кулчĕ

Ларса пыруçăн амăшпе.

Сасартăк чĕрене тем пулчĕ,

«Чупа пуçларĕ» сиккипе.

Ача кулли чуна çутатрĕ,

Кичемлĕх кайрĕ саланса.

…Вăл ал сулса мана ăсатрĕ,

Хăвартăм эп те ыр сунса.

Çĕнĕ комментари хуш