«Телейсĕр çын çак тĕнчере тем чухлĕ...»

Телейсĕр çын çак тĕнчере тем чухлĕ,

Ман вĕсене телей парас килет.

Телей мĕн чухлĕ кирлĕ — кам-ши чухлĕ

Çакна паян пĕлессĕм ман килет.

Пĕлӳçĕсем паян мана калаççĕ:

Телей нихçан та ытлашши пулмасть,

Телейлисем çакна çав чухламаççĕ,

Пит ытлашши телей Турри памасть.

Эппин, пире мĕскер пани те çитĕ,

Ытти мĕн кирлине ĕçре тупар.

Тăванăмсем, хурланар мар-ха питĕ,

Анаталла мар, тăвалла утар.

28.03.2007.

Çĕнĕ комментари хуш