«Пар ăшшуна — пăрланнă эп...»

Пар ăшшуна — пăрланнă эп,

Вăй-халсăр эп паян.

Чĕтрет кĕрхи йĕпхӳ, пĕлеп,

Ман чунăмпа пĕр тан.

Пин-пин хĕвел куратăп та

Тăван куçусенче —

Таçти илем патне туртан

Хăват пур вĕсенче.

Пушах халь ман пуçра, чунра.

Анчах тахçан, унччен

Илемлĕх пурăннă манра —

Вирли вирлисенчен.

Çунтар мана! Чун ăшшине

Валеçрĕм ютсене,

Ман пурнăçăм та, ахăртне,

Ăсаннă инçене.

Пар ăшшуна, чĕнсем, çунтар!

Ак, пăтала та хур.

Сăввăмсене кăна хăвар —

Унта ман чунăм пур.

Çĕнĕ комментари хуш