Электронлă вулавăш

Çырма тĕпĕнче, ялта

Пит хитре хĕр пурăнать.

Хăй вун пиллĕкре кăна,

Темле ĕçе пултарать .

 

Хура çӳçлĕ, кăвак куçлă

Çынсене вăл илĕртет.

Шăнкăрав пек сасси ун

Каччăн чунне çемçетет.

 

Ашшĕ-амăшне ялан

Пур ĕçре те пулăшать.

Чĕлхи çепĕç, вашават

Пуринпе те тарават.

 

Ир-ирех вăл вăранать,

Сывлăмпа питне çăвать.

Хĕвел тухнă-тухманах

Шыв ăсма тухса каять.

 

Пĕррехинче каçхине

Пĕве хĕррине утать,

Каçхи шăпчăк юррине

Чунтан киленсе итлет.

 

Ăшă, çил те çук паян,

Йывăçсем те шавламаççĕ.

Аякра çеç шăплăхра

Шăпчăксем юр(ă) шăратаççĕ.

 

Икĕ хурăн хушшинче

Пĕр пĕчĕк çеç сак ларать.

Каçсерен çак вырăнта

Уçăлмашкăн юратать.

 

Пĕве хĕррипе утса

Нумай хушă çӳрерĕ.

Каçхи шăплăха савса

Шăппăн-шаппăн юрларĕ.

 

Шыв хĕрринче тăнă чух

Кĕтмен çĕртен çил тухать.

Пит çӳллĕ хум килет те

Хĕре çавăрса илет.

 

Хĕре авăр çавăрттарса

Шывалла илсе каять.

Питĕ хыт пăлханнипе

Пике тăнне çухатать.

 

Нумай выртнă-и, сахал-и,

Вăл нимĕн те ас тумасть.

Хĕвел çути ӳксен çеç

Сарă хĕр тăрса ларать.

 

Калама çук илемлĕ

Ку вырăнта тавралăх.

Кайăкĕсен юррийĕ

Савăнтарать пурне те.

 

Кĕтмен-çĕртен хĕр умне

Пĕр каччă тухса тăрать.

Куçĕ унăн çĕмĕрт пек,

Пăхсан витĕр шăтарать.

 

Пĕр вăхăт иккĕшĕ те

Ним чĕрмесĕр тăраççĕ.

Тутисем çеç хушăран

Йăл-йăл кулса илеççĕ.

 

Çапла часах çамрăксем

Пĕр-пĕрне сывлăх сунса

Паллашаççĕ хаваспах,

Калаçаççĕ ыр сунсах.

 

Çак асамлă тĕнчере

Хĕре кăтартса çӳрет.

Кун иртни те сисĕнмест,

Сарă хĕвелĕ анать.

 

Каччă асамлă çулпа

Хĕре ăсатса ярать.

Çак вырăнта тĕл пулма

Хĕр ăна сăмах парать.

 

Кашни кунах каç енне

Пĕве хĕрне вăл васкать.

Икĕ çамрăк туслăхне

Уйăх сăнаса тăрать.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн