Пуç çаврăнни…

«Ан шавла-ха, хĕрĕм, пуçăм çаврăнать», —

Тет мана аннеçĕм, хăй куçран пăхать.

Ăнланмастăп эпĕ унăн сăмахне —

Вырăнтах-çке пуçĕ, çаврăнмасть ним те.

«Мĕншĕн эс шӳтлетĕн çакнашкал, анне?

Эп пачах курмастăп пуç çаврăннине.

Тен, манран кулатăн ку айван тесе?» —

Куçĕнчен пăхатăп лăпкăн тĕсесе.

«Эс, чăнах та, хĕрĕм, айванрах-çке ман.

Пуç çаврăннине те халиччен курман.

Итлесемччĕ, хĕрĕм, санăн ĕмĕрне

Курмалла ан пултăр вăл çаврăннине».

Чăнахах та эсĕ пуç çаврăннине

Кăтартасшăн мар-тăк хăв ачусене,

Эпĕ тĕшмĕртетĕп чирĕн хăватне.

Юрĕ, шавламастăп, çывăрах, анне.

Çĕнĕ комментари хуш