Павари

Геннадий Юмарт | Сăвă | 1 402


Çурçĕр Кавказ тăрăхне

Пĕр вăхăт тĕпленнĕ сăвар.

Мăн асаттемĕр йăхне

Аптратнă вут-вăрçă, кăвар.

 

Пĕр ăрусен пуçĕсем

Тинкернĕ Иран куçĕнчен.

Сутăннă мулшăн вĕсем,

Ăсатнă çарсем хăйсенчен.

 

Тепĕр йышне кăнтăртан

Византи чĕнмешкĕн хавас.

Канăç курмасть вăрçăран

Пуян та илемлĕ Кавказ.

 

Тухăç тыллать кай енне,

Сикет мал енне анăç ен.

Мĕн чул-ши вутра тĕнчене

Пайланă, çунтарнă хальччен?..

 

Акă Кура айлăмне

Çĕрле шăвăнать утлă çар.

Тухрĕ тепри ун умне

Ирпе вăрмантан вăр та вар.

 

Хăвăрт палларĕç: ара,

Ют мар-мĕн — тăван-хурăнташ.

Пĕри вĕçтерет тутăра,

Çывхарчĕ хайхи вăш та ваш:

 

— Таврăнăр, упрăр пуçа!

Пуйма каякан вилнĕ тет.

Çак тăрăхра ху хуçа,

Ун мулĕ пурне те çитет.

 

Ак тырă-пулă ӳстер,

Ĕрчет выльăхна ытларах.

Пурнăн килтех чип-чипер,

Упра пурлăхна вăйлăрах.

 

Килĕ чĕнмесĕр тăшман,

Вĕрен сыхланма инкекрен.

Кам çакăн пек тăрăшман —

Çухалĕ йăлтах тĕнчерен.

 

Е кĕмесен ӳкĕте —

Мала ирттерместпĕр сире.

Çул тытиччен инçете —

Византи мул кӳрĕ пире.

 

Пĕтрĕ мĕн чухлĕ сăвар!

Ахаль те пурнатпăр хăр-хар.

Атьăр патшалăх тăвар,

Сăвар та пĕр юнлă пăлхар!..

 

Çав Павари сăмахне

Итленĕ те таврăннă çар.

Йăх чăмăртанă вăйне,

Питех курăнман тет начар.

 

Çитнĕ ун çарĕ кайран,

Византи чĕнсен, Батума.

Вăл ăсталать çĕн таран

Карман хӳмине аркатма...

 

Вăйлă хунать те сăвар,

Патшалăх пулса вăл тăрать.

Халь асăмра çав сăнар

Мерчен хулипе ялтăрать.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: