Улăпсем

Геннадий Юмарт | Сăвă | 1 455


Пурăннă вĕсем сĕм авалах,

Хапăлланă ырă хавала.

Пулнă тет хăйсем шултра,

Атлантсем пек вăйлă та патвар.

Çичĕ çухрăм пулнă тет утти,

Çичĕ чалăш тăршшĕ — çăпати.

Хăтлăх кӳнĕ хăтсăр тĕнчене,

Тытнă теççĕ пурнăç тыткине.

Пĕлĕте çĕкленĕ тет çӳле

Ирĕккĕн хăйсем çӳремелле;

Ăшăнмашкăн тупнă кăварне,

Шăрăх чух çутарнă çумăрне.

Вырăнтан куçарнă тет тăва,

Çĕн çулпа юхтарнă тет шыва.

Тĕнчене шыв илнĕ те — талай

Шавласа тăрайнă тет чылай.

Пур чĕр чун пĕтес патне çитсен

Улăп çăлнă тет путассинчен:

Хывнă та вăл хăйĕн кĕпине

Мăшăррăн тултарнă ун ăшне.

Тытнă тет пĕр вăхăт пĕлĕтре,

Шыв чаксан антарнă тет çĕре.

Пулнă тет кĕпи асамлăскер,

Çитмĕл çич тĕспе тĕрленĕскер.

Иксĕлми вăй панă — хĕн килсен,

Çĕнеймен никам та — кĕрешсен.

Хăваланă вăл тăшмансене —

Татăлма паман тăван йăхне.

Йыхăрсан та ют çĕре Мерчен

Вăл кайман çуралнă çĕрĕнчен.

Савнă çĕрĕ пулнă хаклăрах,

Чăн телейĕ — хамăр халăхра.

Улăп ватăлса шуралнă та

Вырăн тупнă чаплă масарта:

Пĕчĕкçĕ ту евĕрлĕ тĕми

Нихăçан йăшса çĕтми-пĕтми.

Çав тĕме çине ларса кансан

Иксĕлми вăй-хал кĕрет-мĕн сан.

Йывăрлăх килсен çĕршывăма

Улăп хатер чĕрĕлсе тăма.

Çил çунатлă шурă утпала

Çĕкленсе вара вăл тухмалла.

Улăпăн тăпри асамлă тет:

Хытнă анана иккен имлет.

Мул тăпри тесе вара ăна

Ывçăн-ывçăн сапнă пахчана...

Улăп йăхĕнчен эпир, туссем!

Улăпла — эпир тăвас ĕçсем.

Халăх вăй илет улăпсемпе,

Пурăнар вĕсен хавалĕпе!

Тулăхрах сапса мул тăприне

Имçамлар-и пурнăç йывăçне!

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: