Хĕвел сăнĕ

Ялти учительница Ольга Васильевна

Шубинăна (Нагорновăна)

Синкерлĕ те хĕн-хурлă килчĕ

Çав авăн уйăхĕ пирте.

Пуç çийĕн вĕçрĕ вăрçа вирчĕ,

Çил кумрĕ тăлăххăн хирте.

Çапах ача-пăча васкарĕ

Сумка çакса тăван шкула.

Пĕрремĕш кун. Ку уяв мар-и?

Вăл ĕмĕрлĕх асра юлать.

Уявĕ икĕ хут хаваслă:

Учитель çĕнĕ-çке ара!

Çап-çамрăк питлĕ-куçлă, ăслă,

Сасси, çăлкуç пек, янăрать.

Класа хĕвелĕн çутă сăнĕ

Кĕрсе çутатнăн туйрăмăр.

Калас сăмахĕ те ун çĕнĕ,

Чунпа кунран кун пуйрăмăр.

Мĕн чул йăлттам, çунатлă юрă

Вĕрентĕмĕр эпир çав çул!

Паян асаилмешкĕн ырă,

Куç умĕнчех çав хăтлă шкул.

Çулсем кашларĕç, хум пек, йышлă,

Асри ачалăх — аякра.

Пур астăвăм çӳпçи. Вăл — ăшлă,

Хамăрпала ялан çумра.

Çав çӳпçере вĕрентекенĕн

Хĕвеллĕ сăнĕ те пуртан

Çӳретĕп Çĕр çинче телейлĕн,

Пĕр шиксĕр çул çинчи муртан.

Çĕнĕ комментари хуш