Çуралнă çĕр çинче

Аркадий Лукин | Сăвă | 1 011


Этмен вăрçи пулнăранпа 1993 çулхи çĕртме уйăхĕнче 80 çул çитнĕ май

 

Çĕр те шыв тата сывлăш —

Чĕрĕ пурнăç асамĕ.

Пирĕн вăй, пирĕн сывлăх

Çав тесе эп калам-и?

 

Çĕр пире тăрантарнă,

Çунат хушнă, ӳстернĕ,

Ĕçлеме пархатарлăн

Ыррăн-сумлăн вĕçтернĕ.

 

Çавăнпа ĕмĕр-ĕмĕр

Пуç таять çĕре халăх.

Анчах пурнăç, атьсемĕр,

Килнĕ пуç çавăрмалăх.

 

Çитмен пурнăç каварлă,

Халăха çапăçтарнă...

Кам пуян — тутă ларнă,

Чухăнни тар юхтарнă.

 

Çук, ахаль юн юхман çав

Этмен çĕрĕ çинче те.

Иртнĕ вăхăт-асапçă

Хыçалта та — инçе пек...

 

Иртнине кам-ха манĕ?

Вăл ĕç халăх кун-çулĕ.

Хăй çĕрне саваканĕн

Халăхра ячĕ юлĕ.

 

Эй, çуралнă çĕршывăм,

Пуç таям сана сумлăн.

Эс пуртан эпир сывă,

Малашне те ыр сунăн.

 

Пурпĕрех сана темшĕн

Хисепе хураймастпăр.

Ĕç çыннишĕн, этемшĕн

Вăй-хална çавраймастпăр.

 

Пурнаймастпăр пĕри те

Шывсăр, сывлăшсăр, çĕрсĕр.

Çĕр çинче мул вăрри пек

Çӳрер мар чыссăр-нĕрсĕр.

 

Пурăнмашкăн çĕр кирлĕ,

Сар хĕвел — савăнмалăх.

Ĕçлеме туслăн-мирлĕн

Яланах хатĕр халăх.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: