Мулкач йĕрне ӳкнĕ вĕшле пек...

Мулкач йĕрне ӳкнĕ вĕшле пек,

Пĕр шухăш çӳрет ман хыçран:

Этем пултарсассăн вĕçме те —

Ӳкет те, апла, хушăран.

Чуна-и, ăса-и тăллатăн,

Сĕнксе айлатни — пĕр самант.

Тĕнче сасне пурпĕр тăнлатăн,

Тĕнчийĕ вара — асамат.

Ахаль те-ха кирлĕ вăй-халĕ,

Çĕклетĕн усăннă пуçа.

Кӳтсе йынăшни те çухалĕ

Чĕнсессĕн ăста купăсçа.

Мулкач йĕрне ӳкнĕ вĕшле пек,

Чăн шухăш çӳрет ман хыçран:

Этем пултарсассăн вĕçме те —

Ӳксен те тăрайĕ кайран.

Çĕнĕ комментари хуш