Электронлă вулавăш

Çу уйăхĕн тăххăрмĕш кунĕ...

Этем ĕмрисен тӳпинче

Ялан вăл çут çăлтăр пек çунĕ,

Манмасть ăна пĕтĕм тĕнче.

Эпир, ачапча, шкултаччĕ

Çав кун хутаç пек сумкапа.

Шур çӳçлĕ учитель пĕлтерчĕ

Пире чĕрери хаваспа:

— Вут-вăрçă пĕтнĕ... Итлĕр;

Кĕрлет çĕршывра Çĕнтерӳ!

Тĕп пулнă тикех юнлă Гитлер! —

Калаçрĕ учитель хĕрӳн.

Тăватă çулталăк-çке кĕтнĕ

Ватти те вĕтти çак куна.

Тинех хайхи... вăрçă пĕтнĕ!..

Хыпар шăнăçмасть яш чуна.

— Урра! та урра! — янрататпăр

Сумка çакса таврăннă май.

Çаплах кам пĕлмен — хыпарлатпăр, —

Ялти урамра çын нумай.

Лавкка умне халăх пĕвеннĕ, —

Кунта пухăнатчĕ пасар.

Паян та унта çын иленнĕ

Илтсессĕн хаваслă хыпар.

Крыльца умне пухăннă халăх

Тăнлать тилмĕрсе старике.

Трибуна çинчи пек вăл — калăн...

Ку кам? Герой ашшĕ иккен.

Çапла пуçласа эп курсаччĕ

Çав кун Кĕркури пиччене.

Танкист унăн ывăлĕ — Князькин —

Текех таврăнаймĕ килне.

Вăл çак Çĕнтерушĕн пуç хунă

Тин сӳннĕ хаяр вăрçăра.

Ыратнă сурса ашшĕн чунĕ,

Паян та пирте çав суран.

Хушса калани

Иртнĕ çулхи (2008) чӳк уйăхĕн 6-мĕшĕнче Ульяновск облаçĕнчи Чăнлă районĕнчи Кивĕ Улхаш ялĕнче çуралса ӳснĕ Совет Союзĕн Геройĕ Николай Григорьевич Князькин (1919-1943) Киев хулине ирĕке кăларассишĕн пынă хаяр çапăçура пуç хунăранпа 65 çул çитрĕ. Çавна май ялти культура çуртĕнче асăну каçĕ иртрĕ. Манăн çак сăвă паттăр ентешĕн çутă сăнарне асăнса унăн палăкĕ умне хунă чечек кăшăлĕ вырăнне пултăр.