Илья Думилин


Илья Петрович Думилин 1911 çулхи утă уйăхĕн 9-мĕшĕнче Патăрьел районĕнчи Тăрăнта вăтам хресчен кил-йышĕнче çуралнă. Малтан хăйсен ялĕнчи пуçламăш шкулта, унтан Туçари сакăр çул вĕренмелли шкулта вĕреннĕ. 1928 çулта вăл «Канаш» (хальхи «Хыпар») хаçат редакцийĕн экспедици кантурĕнче ĕçленĕ.

Пĕрремĕш пилĕкçуллăх вăхăтĕнче И.Думилин Инçет Çурçĕре тухса кайнă, унти паллă стройкăсем тăрăх курса çӳренĕ. 1933 çулта каллех яла таврăннă, темиçе çул хушши пуçламăш шкулта учительте ĕçленĕ.

И.Думилин литература ĕçне сăвăсенчен тытăннă. Унăн малтанхи сăввисем 1928 çулта «Сунтал» журналта пичетленнĕ.

1941 çулта поэт Тăван çĕршывăн аслă вăрçине тухса кайнă. Вăрçăн малтанхи кунĕсенчен пуçласах отделени командирĕ пулнă. 1942 çулхи чӳк уйăхĕнче вăл Сталинград патĕнче паттăрсен вилĕмĕпе вилнĕ.

1934 çулта И.Думилинăн «Хумсем» ятлă сăвă кĕнеки тухнă.


Хайлавĕсем